Aizawl 14th June, 2024 (Fri): Vawiin khan Adviser to CM (Finance & Planning), TBC Lalvenchhunga office ah Aizawl West I MLA bial puala siam mobile application, “Aizawl West One Online” tih chu Vanneihtluang an a tlangzarh.

Vanneihtluanga chuan, mobile application tha tak siam a ni chu lawmawm a tih thu a sawi a. West I mipuite tan a tangkai hle a a rin thu a sawi. Midangte pawn entawn ve se, langtlang sawrkar kan neih theih nana kan harh chhuahna hnar ni thei se a duh thu a sawi.

West I bialtu Pu TBC Lalvenchhunga pawhin thu sawiin, an app siam chu thlan tlin a nih hmaa a lo tiam tawh a nih thu leh ‘Langtlang Sawrkar’ an nih zia tilangtu atana siam a nih thu a sawi a ni.

Aizawl West One Online app hi Lailen company siam niin, anni hian a hman dan an entir a. He app ah hian Aizawl West I Constituency chhunga MLA Fund leh sawrkar department hrang hrang te project te, project man zat te, a thawktu leh Physical leh Financial Progress te thlengin tarlan a ni. Tin, bialtu MLA chet velna leh MLA in thuchah a neih te pawh tarlan theih a ni. Aizawl West I chhunga sawrkar hmunhma pawimawh te tarlanna leh mipuiten Project chungchanga sawisel emaw thurawn engpawh, he app kaltlang hian MLA hnenah an thlen thei bawk.

Aizawl West One Online app hi Android leh iOS tan siam niin Playstore leh Appstore atangin a download theih reng a ni. Hemi hma hian Lunglei North bialtu MLA V. Malsawmtluanga chuan 'MSTA app' siam tawhin Lunglei North bial bakah Lunglei district chhunga bialtu MLA leh HPC Vice Chairman ni bawk V. Malsawmtluanga hnathawh dan hrang hrang lang tlang taka dahna hi tlangzarh a lo ni tawh bawk.